Алжир улсыг 1999 оноос хойш удирдаж буй Ерөнхийлөгч Абделазиз Бутефлика ирэх сарын 18-нд зохион байгуулагдах Ерөнхийлөгчийн сонгуульд 5 дахь удаагаа өрсөлдөхөө илэрхийлж, энэ сарын 4-нд Сонгуулийн Ерөнхий хороонд нэрээ бүртгүүлээд байв.

Түүнийг нэрээ бүртгүүлсний дараа тус улсын иргэд "Алжир шинэ цагийн удирдагчтай болох ёстой" хэмээн эсэргүүцэж тэмцжээ. Хүчтэй тэмцлийн дүнд  82 настай Абделазиз Бутефлика Ерөнхийлөгчийн сонгуульд нэр дэвшихээ болж, албан ёсоор нэрээ татжээ. Эсэргүүцлийн жагсаал хүрээгээ тэлж, зөвхөн Алжир гэлтгүй олон оронд ажиллаж, амьдарч буй тус улсын иргэд дургүйцлээ илэрхийлэн, дуу хоолойгоо нэгтгэсэн бөгөөд жагсагчидтай тус улсын 1,000 гаруй шүүгчид нэгдэж ажил хаялт зохион байгуулсан аж.