Японы нутгийн баруун хэсгийг хүчтэй хар салхи дайрах тул мягмар гаргийн зарим чиглэлийн “шинкансен” галт тэрэгний хөдөлгөөн, онгоцны нислэгийг цуцална гэж цаг уурын агентлаг болон тээврийн оператор-компаниуд мэдэгджээ. Лан хар салхины улмаас Нагоя, Шин-Осака хотын хоорондох “Токайдо Шинкансен” шугамын бүх хөдөлгөөнийг мягмар гарагт цуцална гэж Төв Японы төмөр замын компани (JR Central) мэдэгдсэн бол Баруун Японы төмөр замын компани Шин-Осака болон Окаяма станцуудын хоорондох үйлчилгээг цуцалж магадгүй гэж мэдэгдлээ. Мөн Токио, Нагоя өртөө хоорондын “шинкансен” галт тэрэгний хөдөлгөөн мягмар гарагт эрс хумигдаж, суман галт тэрэгнүүд ихэвчлэн суудал захиалгагүйгээр зорчигчдыг тээвэрлэнэ гэж “JR Central” мэдэгджээ. Харин даваа, лхагва гарагт үйлчилгээгээ түр зогсоохоор төлөвлөөгүй байгаа хэдий ч хуваарьт гэнэтийн өөрчлөлт гарч болзошгүй гэдгийг зорчигчдод анхааруулсан байна. Даваа гарагт Японы баруун хэсэгт орших Итами нисэх онгоцны буудлын 19 нислэг, мягмар гарагт 240 нислэг цуцлагдсан тухай “Japan Airlines” компани мэдээллээ. Өнөөдөр өглөөний 9 цагт хар салхи Вакаяма мужийн Шиономисаки хошуунаас зүүн өмнө зүгт 260 километрийн зайтай байсан бөгөөд баруун хойд зүг рүү шилжиж байна. гаарын даралт 965 гектопаскаль, салхины хурд цагт 198 км хүрсэн тухай Японы цаг уурын агентлаг мэдээлжээ.
