ЗГХЭГ-ын дарга Д.Амарбаясгалан Засгийн газрын өнөөдрийн хуралдаанаас гаргасан шийдвэрийг танилцуулав:   

-Бид өнөөдөр нийт 14 асуудал хэлэлцэв. Үндэсний хэмжээнд үйл ажиллагаа явуулах шинэ хороодыг эмхлэн байгуулах үүргийг ЗГХЭГ-т өглөө. Нийслэлийн түгжрэлийн асуудлыг эрхэлсэн сайд томилогдсон тул Улаанбаатар хотын түгжрэлийг бууруулах, агаарын бохирдлыг бууруулах, спортыг дэмжих зэрэг 20 орчим үндэсний хороо байгуулна. 

2023 оны улсын төсвийг сэтгүүлчид, олон нийтээр ирэх сард ил тод хэлэлцүүлсний дараа УИХ-д өргөн барина. Иргэдэд төсөвтэй холбоотой байр сууриа илэрхийлэх боломжийг олгоно.

“Эрдэнэс Монгол” компанийн үйл ажиллагааг жигдрүүлэх, Баялгийн сан болгох ажлыг сүүлийн нэг жилийн турш хийсээр байна. Энэ компанийг удирдах гүйцэтгэх захирлын сонгон шалгаруулалтыг явуулж, нээлттэй зарлах үүргийг Ерөнхий сайд өглөө. Сингапур, Норвегийн баялгийн санд ажилласан туршлагатай, гадаад болон дотоодын иргэдийн дунд сонгон шалгаруулалт зарлана.   

Монгол Улсад үйл ажиллагаа явуулдаг ААН-үүдийн тооллогыг таван жилд нэг удаа хийдэг. Сүүлийн тооллогоор 180 мянган ААН тоолжээ. 53 мянган иргэн хувиараа хөдөлмөр эрхэлж байна.

2016-2021 оны хооронд 61 мянган ААН шинээр бүртгүүлжээ. Татан буугдсан 14 100 ААН байна. Татан буулгахад олон шат дамжлага шаардлагатай байдаг тул ихээхэн сунжирдаг юм байна. Эдгээрийг бууруулах, ААН-ийн дарамтыг бууруулах, хүнд суртлыг арилгах шийдвэр гарлаа.

Төрийн бүтцийг хялбаршуулна. Ерөнхий сайд ирэх оны нэгдүгээр сараас МХЕГ-ын чиг үүргийг, нэр, зорилгыг өөрчлөх үүрэг өглөө. Яамд руу зарим хяналт шалгалтыг шилжүүлнэ. Жишээ нь эрүүл мэндийн хяналт шалгалтыг цаашид Эрүүл мэндийн яам хариуцна. Сангийн яам санхүүгийн хяналт шалгалтаа, БОАЖЯ уул уурхайн компаниудад хяналтаа тавина. Харин МХЕГ төрийн байгууллагуудад л хяналтаа үргэлжлүүлнэ. Төр үүргээ биелүүлж буй эсэхэд л анхаарна.Орон тоо нэмэгдэхгүй. 

Нийслэлийн түгжрэлийг зөвхөн машинтай холбон ойлгож болохгүй. Маш олон хүчин зүйл нөлөөлдөг. Дугаарын хязгаарлалт эхлүүлснээр нийслэлийн машины тоо 30 хувиар өссөн. Дутуу, яаруу шийдвэрийг олон нийтэд танилцуулж болохгүй. Тооцоо судалгаатай, эрдэмтдийн саналд үндэслэн, өргөн хүрээний хэлэлцүүлэг явуулсны дараа шийдвэр гаргана. Өмнө нь сайн шийдвэр гаргасан ч  олон нийтийн дэмжлэг аваагүйгээс хэрэгжээгүй тохиолдол бий. Хайран. Би хотын даргаас энэ талаар тодруулна. Тэгш сондгойгоор хязгаарлавал дахин машин нэмэгдэж болзошгүй тул сэтгэлийн хөдөлгөөнөөр хандаж болохгүй. БШУЯ-наас хамран сургах тойрогтоо л хүүхдээ сурга гэж байна. Гэтэл хувийн сургуулийнхан автобус, машинаар хүүхдүүдээ хүргэсээр л байна. Иймд эдгээр эцэг эхчүүд нэмэлт төлбөр төлөх ёстой гэв.