Оюу Толгой төслийн тулгамдсан асуудлыг шийдвэрлэх, Монгол Улсын хүртэх өгөөжийг нэмэгдүүлэх, ашиг хүртэх хугацааг наашлуулах зорилгоор Монгол Улсын Их хурлын 2019 оны 11 дүгээр сарын 21-ний өдрийн “Оюу Толгой ордын ашиглалтад Mонгол Улсын эрх ашгийг хангуулах тухай” 92 дугаар тогтоол, Монгол Улсын Их хурлын 2021 оны 12 дугаар сарын 30-ны өдрийн "Оюу Толгой ордоос Монгол Улсын хүртэх үр ашгийг нэмэгдүүлэх арга хэмжээний тухай” 103 дугаар тогтоол тус тус батлагдан гарсан.

Монгол Улсын Их хурлын дээрх тогтоолуудын хэрэгжилтийг хангах, Монгол Улсын Засгийн газрын эзэмшлийн 34%-ийн хувьцааны үр өгөөжийг сайжруулах чиглэлд Эрдэнэс Оюу Толгой компани шаардлагатай арга хэмжээнүүдийг хэрэгжүүлж байна. Энэ хүрээнд Эрдэнэс Оюу Толгой компанийн төлөөлөл Онтре Ресурс компанийн удирдлагуудтай Оюу Толгой төслийн Хөрөнгө оруулалтын гэрээнд тусгагдсан Онтрэ компанийн эзэмшиж буй тусгай зөвшөөрлүүдтэй холбоотой асуудлаар уулзлаа.

“Эрдэнэс Оюу Толгой” ХХК нь Оюу Толгой төслийг хэрэгжүүлэгч “Оюу Толгой” ХХК-ийн хувьцаа эзэмшигчийн хувьд төслийн үйл ажиллагаатай холбоотой Онтрэ Ресурсийн тусгай зөвшөөрлийн асуудлаар Монгол Улсын Компанийн тухай хууль болон бусад хууль тогтоомж, төслийн холбогдох гэрээ, эрх зүйн баримт бичигт тусгагдсан шаардлагатай арга хэмжээг авч хэрэгжүүлж, Монгол Улсын эрх ашгийг хангуулж, хүртэх үр ашгийг нэмэгдүүлэх, чиглэлээр ажиллаж байна.