Эрүүл мэндийн яамнаас COVID-19 халдварын цаг үеийн нөхцөл байдлын тухай ээлжит мэдээллийг /2020.04.08/ хийлээ. Хэвлэлийн хуралд ХӨСҮТ-ийн захирал Д.Нямхүү, Эрүүл мэндийн яамны Тандалт, шуурхай удирдлагын хэлтсийн дарга Д.Нарангэрэл, ЭМЯ-ны Гадаад харилцааны хэлтсийн дарга Б.Янжмаа, ДЭМБ-ын мэргэжилтэн О.Ариунтуяа нарын албаны хүмүүс оролцов.
Европ тивд, Турк улсад халдварын тохиолдол эрчимтэй нэмэгдэж, нийт халдвар авсан хүний тоо 34 мянга давсан гэдгийг мэдээлжээ. БНСУ-д өвчлөл буурч байгаа боловч залуус цэнгээний газарт олноор цугларч буй тул өвчлөл ихээр нэмэгдэх эрсдэл үүсч байгаа аж.
ХӨСҮТ-ийн ерөнхий захирал Д.Нямхүү "2020.04.07-ны өдөр ХӨСҮТ болон Монгол Улсын хэмжээнд сэжигтэй тохиолдол тусгаарлагдаагүй. Сэлэнгэ аймагт тусгаарлагдсан таван хүнээс вирус илрээгүй. Харин нэг хүнээс COVID-19 вирус илэрлээ. Уг иргэн Алтанбулагийн боомтоор гуравдугаар сарын 26-27-нд шилжих шөнө орж ирж ганцаараа тусгаарлагдсан. Анхны шинжилгээний хариу гуравдугаар сарын 28-нд сөрөг гарсан ч дөрөвдүгээр сарын 7-8-ны давтан шинжилгээгээр эерэг хариу гарч вирус илэрсэн. Ингээд нийт Монгол Улсад батлагдсан тохиолдол 16 боллоо" гэж мэдээллээ.