Чинь Ган өнгөрсөн сарын 25-ны өдрөөс хойш олон нийтийн арга хэмжээнд оролцоогүй2013-2022 онуудад Гадаад хэргийн сайдаар ажиллаж байсан Ван И-г эргэн томиллоо

БНХАУ-ын Гадаад хэргийн сайд Чинь Ган өнгөрсөн сарын 25-ны өдрөөс хойш олон нийтийн арга хэмжээнд оролцоогүй. Тэрбээр сар гаруй хугацаанд сураггүй байгаа юм. Тэгвэл түүнийг өчигдөр сайдын үүрэгт ажлаас нь чөлөөлж, Ван И-г эргэн томилохоор болсныг Синхуа агентлаг баталсан байна.

Түүнийг үүрэгт ажлаас нь чөлөөлж байгаа шалтгаан одоогоор тодорхойгүй байгаа бөгөөд “Хятадын эрх баригчид санал хурааж, Ван И-г Гадаад хэргийн сайдад томилохоор болсон. БНХАУ-ын дарга Ши Жиньпин гарын үсэг зурж, баталсан” хэмээн тус агентлагаас мэдээлжээ. 

Ван И нь 2013-2022 оны хугацаанд Хятадын Гадаад хэргийн сайдаар ажиллаж байсан. 12 дугаар сард түүний халааг авч, томилогдсон Чинь Ганыг БНХАУ-ын дарга Ши Жиньпиний ойрын хүмүүсийн нэг гэдэг. Тэрбээр хоёр жил орчим хугацаанд АНУ-д элчин сайдаар ажилласан юм.

Мөн Хятадын төв банкны ерөнхийлөгч И Ган тэтгэвэрт гарах болсон тул түүний оронд Пан Гоншенийг томилохоор болжээ.