Владимир Путин хувийн хөлсний Вагнер бүлэглэлийн бослогын дараа оросууд урьд өмнөхөөсөө илүү эв нэгдэлтэй болсон гэж мэдэгдэв. ОХУ-ын Ерөнхийлөгч мягмар гарагт болсон Шанхайн хамтын ажиллагааны байгууллагын (ШХАБ) виртуал уулзалтын үеэр БНХАУ-ын дарга Ши Жиньпин, Энэтхэгийн Ерөнхий сайд Нарендра Моди зэрэг Азийн удирдагчдын хамт үг хэлсэн. Тэрбээр "Оросын ард түмэн урьд өмнө хэзээ ч байгаагүйгээр нэгдэж байна. Оросын улс төрийн хүрээнийхэн болон нийгэм бүхэлдээ зэвсэгт бослого гаргах оролдлогын эсрэг нэгдсэн фронт болж хариу үйлдэл үзүүлэхдээ эв нэгдэл, эх орныхоо хувь заяаны төлөө хариуцлага өндөрссөн гэдгээ тод харуулсан" гэжээ.
Вагнерын бослого гарснаас хойш 10 хоногийн дараа буюу мягмар гарагт Путин Нью Делигийн удирдсан виртуал дээд хэмжээний уулзалтын үеэр хэлсэн үгэндээ Украины түрэмгийлэлд анхаарлаа хандуулж, “Барууны хориг арга хэмжээ, өдөөн хатгалгын эсрэг Орос зогсох болно” гэв. Москва болон тус улсын олигархиуд Украины эсрэг дайн эхлүүлснийх нь төлөө олон улсын хамтын нийгэмлэгээс тавьсан олон зуун санхүүгийн хориг арга хэмжээнд өртөж байна. Бослогын үеэр Оросын эрх баригчдыг дэмжсэн ШХАБ-ын орнуудад талархал илэрхийлж, барууныхан Украиныг Оросын эсрэг дайсагнагч улс болгосон гэдгийг тодотгосон байна.
Үүнээс гадна Путин Москва ШХАБ-ын гишүүн орнуудтай харилцаагаа хөгжүүлэхийг эрмэлзэж байна гэж хэлээд гадаад худалдаанд төлбөр тооцоог үндэсний мөнгөн тэмдэгтээр явуулахыг дэмжжээ. Өнгөрсөн оны хоёрдугаар сард Украины эсрэг цэргийн ажиллагаа эхлүүлсэн ОХУ-ын Ерөнхийлөгч хэлэхдээ, дэлхий даяар мөргөлдөөн гарах магадлал нэмэгдэж, дэлхийн эдийн засгийн хямралын эрсдэл нэмэгдсээр байна гэжээ. Аюулгүй байдлын асуудлаарх бүлгийн дээд хэмжээний уулзалтад ШХАБ-ын гишүүн орнууд болох Хятад, Энэтхэг, Казахстан, Киргиз, Орос, Пакистан, Тажикистан, Узбекистан зэрэг орны дээд удирдагчид оролцож, Энэтхэгийн Ерөнхий сайд Нарендра Моди уулзалтыг эхлүүлсэн юм.
