Токиогийн Кэйо их сургуулийн эмнэлэгт ердөө 268 грамм жинтэй мэндэлсэн бяцхан хүү тус эмнэлэгт 24 долоо хоногийн турш эмчилгээ, асаргаа хийлгэсний хүчинд 3,238 грамм жинтэй болоод гэртээ харьжээ. Ийнхүү тэр хүү хамгийн бага жинтэй мэндлээд амьд үлдсэн нярай болж чадлаа. Хүү өнгөрсөн наймдугаар сард мэндэлсэн бөгөөд тухайн үед хүүгийн өсөлт нь зогссон байсан тул амийг нь аврахын тулд эмч нар мэс заслын аргаар төрүүлсэн байна. Японд 1 кг хүрэхгүй дутуу төрсөн нярайн амьдрах магадлал 90 хувьтай байдаг бол 300 граммаас доош жинтэй мэндэлсэн нярайн амьд үлдэх магадлал маш бага бөгөөд эрэгтэй хүүхдүүдийн амьдрах чадвар эмэгтэй хүүхдийнхээс харьцангуй бага байдаг аж.