Өнгөрсөн баасан гарагийн УИХ-ын чуулганы хуралдаанд 2018.06.11 УИХ-ын гишүүн Д.Мурат, Д.Гантулга нарын бүрэн эрхийг түдгэлзүүлүүлэх тухай хүсэлтийг Ерөнхий прокурор М.Энх-Амгалан танилцуулсан билээ. Энэ асуудлын хүрээнд УИХ дахь намын бүлгүүд, холбогдох байнгын хороод, дэд хороодоор хуралдан хэлэлцээд тэдний бүрэн эрхийг түдгэлзүүлэх шаардлагагүй хэмээн нэгдсэн хуралдаанаар шийдсэн.
Үүний дундуур УИХ дахь эмэгтэй гишүүд мэдээлэл хийж, нэр бүхий хоёр гишүүнийг эмэгтэйчүүдийн эрхийг зөрчсөн, улс төрчийн ёс зүйгүй үйлдэл гаргасан хэмээн үзэж, эгүүлэн татахыг дэмжсэн байдаг. Энэ мэтээр гурав хоног халуун сэдэв болсон “Хүчирхийлэгч” хоёр гишүүний нэг нь өнөөдөр буюу 2018 оны 06 дугаар сарын 11-нд УИХ-ын гишүүний бүрэн эрхээс өөрийн хүсэлтээр чөлөөлөгдөж буйгаа мэдэгдэн УИХ-ын дарга М.Энхболдод хүсэлтээ гардуулж өглөө. УИХ-ын гишүүн Д.Гантулгын хувьд Би улстөрийн золиос боллоо. Үнэн гэж байдаг бол би гэм буруугаа нотолно. Бүрэн эрхээ түдгэлзүүлэх бус албан ёсоор чөлөөлөгдөх гэж байгаагаа мэдэгдэж байна гэсэн юм. Үүнээс төд удалгүй эмэгтэй гишүүдийн төлөөлөл дахин хэвлэлийн хурал зарлаж Д.Гантулга, Д.Мурат нарын бүрэн эрхийг түдгэлзүүлэхийг эсэргүүцсэн УИХ-ын чуулганы хуралдааны тогтоолын эсрэг хориг тавиулахаар Монгол Улсын Ерөнхийлөгч Х.Баттулгад хандаж буйгаа мэдэгдсэн юм.
Энэ талаар УИХ дахь эмэгтэйчүүдийн бүлгийн ахлагч Д.Оюунхорол хэлэхдээ
“Улсын Ерөнхий Прокурор Д.Гантулга, Д.Мурат нарыг гэмт хэрэг үйлдсэн нь тогтоогдчихсон хэмээн үзэж гишүүнээс нь түдгэлзүүлэхийг хүссэн. Гэтэл УИХ хууль бус шийдвэр гаргаж, хууль зөрчлөө. Д.Гантулга МАН-ын нэр хүндийг унагаж, Монголын төрийг муухай харагдуулж бузарласан. Монголын төр муу муухайгаасаа салах ёстой. Үнэхээр буруугүй бол ахиад улс төрийн зам нь нээлттэй. Д.Мурат гишүүнийг Ардчилсан намынхан яагаад өмөөрөөд байгааг гайхаж байна” хэмээсэн бол. М.Билэгт, Ц.Цогзолмаа, Б.Саранчимэг, Н.Оюундарь нарын гишүүд эмэгтэйчүүдийн эрхийг Монголын төр өөгшүүлж байхад гэмт хэргийн гаралт нэмэгдэх нь ойлгомжтой. Хүний бүр хуулийн дор тэгш эрхтэй” гэсэн юм.
