Нийслэлийн Гэр бүл, хүүхэд, залуучуудын хөгжлийн газраас "Би нар" хүүхэд хөгжлийн төслийн хүрээнд Монголын хүүхдийн ордон, Хүүхдийн урлан бүтээх төвийн 6 төрлийн /морин хуур, драм, дуулаач, бүжиг, уран зураг, хайчилбар/ дугуйлан секцэнд эрсдэлт бүлгийн алслагдсан дүүрэг хороодын нийт 2400 хүүхдийг хамруулахаар болжээ.
Төслийн хүрээнд 8-18 насны хүүхдүүдийг Монголын хүүхдийн ордон, Монголын хүүхдийн урлан бүтээх төвийн дугуйлангуудад үнэ төлбөргүй хамруулах юм.
Монголын хүүхдийн ордны арван багш зургаан сарын хугацаанд нийт дөрвөн төрлийн дугуйланд хүүхдүүдийг хичээллүүлэхээр хөтөлбөрөө гаргажээ.
Сургалтыг дээрх хоёр төвийн багш нар алслагдсан хороодод очин хичээлээ заах бөгөөд дугуйланд суралцах хүсэлтэй хүүхдүүд дүүргийн Хүүхэд, гэр бүл хөгжлийн газарт хандаж бүртгүүлнэ.
Дугуйлан бүтэн зургаан сарын хугацаанд долоо хоногт хоёр удаа хичээллэх юм. Нийт зургаан дүүргийн 2-3 хорооны дунд нэг дугуйлан ажиллуулахаар төлөвлөсөн бөгөөд хорооны иргэний танхимуудад хичээллэх орох ажээ. Уг сургалтанд хамрагдсан хүүхдүүд зургаан сарын дараа нэгдсэн тоглолт, үзэсгэлэн гарахаар төлөвлөжээ.
Хүүхдүүдийг дугуйланд хамруулснаар гоо зүйн мэдлэг, авьяас хөгжихөөс гадна мэргэжлийн чиг баримжаатай болж, өөрийгөө нээдэг гэдгийг мэргэжлийн багш нар дурдав.
