Баянгол дүүргийн 47 дугаар сургуулийн хөлбөмбөгийн талбай дээр барилга баригдах эсэх талаар тус сургуулийн захирал Ч.Наранмандахаас тодрууллаа. Тэрбээр “Манай сургууль зүүн талдаа хөлбөмбөгийн буюу хүүхдийн тоглоомын талбайтай. Уг талбайн зарим хэсэг болон хуучин автомашины зогсоол байсан газарт сургуулийн дөрвөн давхар 360 хүүхдийн суудалтай өргөтгөлийг барих ажил энэ сарын 17-ноос эхэлсэн аж. БСШУСЯ-наас хавар тендер зарлаж, “Алтантрейд” ХХК шалгаран ажлаа эхлүүлээд байна. Одоогоор барилгын суурийг бэлтгэх ажил үргэлжилж байгаа. Тоглоомын талбайн багахан хэсэг барилгын талбайд багтсан. Барилгын ажил дууссаны дараа талбайг дахин тохижуулна. Төлөвлөгөө ёсоор бол өргөтгөл 2019 оны есдүгээр сарын 1-нд ашиглалтад орно” гэв.