Шүхэрт хувьсгалын гол зохион байгуулагчдын нэг мөн өнөөгийн Хонгконгийн эсэргүүцлийн хөдөлгөөний удирдагчдын нэг болсон Жошу Вонг наймдугаар сард баривчлагдсан ч дээд шүүхэд давж заалдан, улмаар суллагдаад удаагүй байгаа юм. 

Тэрбээр бусад хүний эрхийн төлөөх тэмцэгчдийн хамт Вашингтон айлчилж байгаа бөгөөд энэ үеэрээ хэвлэлийнхэнд байр сууриа илэрхийлжээ.

Тухайлбал “AFP ” агентлагт өгсөн ярилцлагадаа тэрбээр “Хонгконг дэлхийн түвшний орчин үеийн хот байснаа цагдаагийнхны зүгээс хүч хэрэглэдэг цагдаагийн хот болсон” хэмээн үзэж байгаагаа илэрхийлсэн байна. 

Түүний энэ байр суурийг Хонгконийн поп дуучин Дениз Хо мөн дэмжин, Хонгконгийн Засгийн газар цагдаагийнхны ард нуугдан, хямралыг шийдэх гарц хайхаас татгалзан, Хонгконг “цагдаагийн улс болж байна” хэмээн мэдэгджээ. 

Энд дуулгахад, өмнө нь Жошуа Вон, Дениз Хо болон бусад идэвхитнүүд Хонгконг дахь иргэний эрх чөлөөг боомилсон албан тушаалтнуудын эсрэг хориг арга хэмжээ тавих талаах тусгасан Хонгконг дахь хүний эрх, ардчиллын тухай хууль хэлэлцэхийг Вашингтонд хандан уриалж байлаа. 

Хонгконг: Жагсагчид АНУ-аас дэмжлэг хүсэв 

Харин БНХАУ АНУ-ын Конгресс ийм хууль хэлэлцэх нь Хятадын дотоод хэрэгт оролцож буй хэрэг хэмээн мэдэгдэж байв. 

Эсэргүүцлийн шалтгаан 

Гурван сар гаруй хугацаанд үргэлжилсэн Хонгконг дахь эсэргүүцлийн эхлэх шалтгаан нь БНХАУ-ын хууль тогтоомжийг зөрчсөн хэрэгт сэжиглэгдсэн этгээдүүдийг Хонгконгоос эх газрын Хятад руу шилжүүлэх тухай хуулийн төсөл байлаа. Олон нийтийн шахалтаар энэ хуулийг хэлэлцэхгүй гэж Кэрри Лам мэдэгдсний дараа жагсагчдын шаардлага өөрчлөгдсөн юм. Өнөөдөр тэд Хонгконг дахь Хятадын нөлөөллийг хязгаарлах, автономт улсын оршин суугчдын бүх нийтийн сонгуулийн эрхийг хангах зорилготойгоор улс төрийн тогтолцооны шинэчлэлтийг хийхийг шаардаж байгаа.

Жошуа Воны өгүүлснээр сүүлийн гурван сард Хонгконгийн эрх баригчид жагсаалтай холбоотойгоор 1500 гаруй хүн баривчилсан бол Вон болон өөр дахин 200 идэвхитэнд шүүхээс ял оноохоор төлөвлөж байгаа гэнэ. 

Эсэргүүцлийн шинэ давалгаа 

Хонгконг дахь ээлжит эсэргүүцэл есдүгээр сарын 21, 22-ны өдөр боллоо. Жагсагчид Бээжингийн нөлөөллийг сулруулж, ардчилсан шинэчлэлт хийхийг шаардсан байна.  Эсэргүүцэл  тайван эхэлсэн ч жагсагчид Хятадын төрийн далбааг урж, шатаасны дараа байдал хурцаджээ. Жагсагчид цагдаагийнхан руу чулуу нүүлгэж, харин цагдаагийнхан нулимс асгаруулагч хий ашигласан бөгөөд улмаар бямба гаригт болсон жагсаалын үеэр БНХАУ-ын төрийн далбааг гутаан доромжилсон хэрэгт сэжиглэн 13 настай охиныг ням гаригт баривчилжээ. 

Мөн энэхүү жагсаалыг эрс шүүмжилж байгаагаа Хонгконгийн Засгийн газар илэрхийлсэн байна. 

“Хэт даврагчид зам хааж, галдан шатааж, шатамхай бодис бүхий лонх шидэн, улмаар метроны буудлууд халдлагад өртөж, үйл ажиллагаа нь алдагдсан. Зарим хүмүүс цагдаагийн офицер рүү халдаж, зэвсгийг нь булаах гэж оролдсон, мөн төрийн далбааг шатааснаар улсын тусгаар тогтнолыг эрсдэлд орууллаа” хэмээн Засгийн газрын төлөөлөгч мэдэгджээ.

Өнгөрсөн ням гаригт болсон жагсагчид болон цагдаагийнхны хоорондох мөргөлдөөний улмаас 89 хүн баривчлагдаж, 18 хүн шархадсан байна.