Г.Батхүү, Х.Тэмүүжин, Б.Дэлгэрмаа нар АН-ын дэд дарга болжээ.  Өнгөрсөн амралтын өдрүүдэд болсон тус намын 29 жилийн ойгоор Үндэсний бодлогын хороо нь хуралдаанаа хийж,  тэднийг  намын дэд даргаараа ийнхүү сонгосон байна. Ингээд АН  6 дэд даргатай болж байгаа бөгөөд Р.Амаржаргал, З.Нарантуяа, Б.Пүрэвдорж нар мөн багтаж байгаа юм. 

Өмнөх Үндэсний бодлогын хорооны хуралдаанаар УИХ-ын гишүүн З.Нарантуяа, Б.Пүрэвдорж, Р.Амаржаргал нарыг дэд даргаараа сонгоод байсан юм. УИХ-ын гишүүн асан Х.Тэмүүжин, Р.Амаржаргал нарын гишүүд намын үйл ажиллагаанд идэвх санаачилгагүй оролцсон, татвар төлөөгүй гэх шалтгаанаар ҮБХ-ны гишүүнээс хасагдаж байсан. Үүнээс үзэхэд эрх нь сэргэсэн дарга нарыг сүүлийн үед намаа өмгөөлж нэлээн дуугарсан гэж дүгнэж болохоор. 

Харин өнгөрсөн 3 сараас явагдсан ротацид Ерөнхийлөгчийн Тамгын газрын дарга З.Энхболд Сүхбаатар дүүргээс,  Ерөнхийлөгчийн төрсөн ах Х.Баттуул Хан-Уул дүүргээс ҮБХ-нд сонгогджээ.  Түүнээс гадна Ерөнхийлөгчийн Тамгын газрын даргаар ажиллаж байсан П.Цагаан Баянзүрх дүүргээс, УИХ-ын гишүүн асан Д.Одхүү Сонгинохайрхан дүүргээс тус тус сонгогдон орж иржээ. Тэд инхүү бууриа сэлгэсэн нь 2020 онд тус тойргуудад нэр дэвших бололтой.