Ц.Оюунбаатар болон түүний хүү О.Тэмүүжин, Биеийн тамир спортын хорооны дарга Д.Жаргалсайхан нарт холбогдох авлигын хэргийн шүүх хурал өчигдөр болсон. Шүүх хурал орой 21.30 цаг хүртэл хуралдаад өнөөдөр 10.00 цагаас үргэлжлүүлэн хуралдсан тэрээр хэргийг мөрдөн байцаалтын шатанд буцаахаар шийдвэрлэжээ.

Шадар сайд асан Ц.Оюунбаатарыг албан тушаал, авлига хээл хахуулийн хэргээр АТГ-аас нэлээд хугацаанд шалгасан бөгөөд 2018 оны 6 дугаар сард прокурорын байгууллагад шилжүүлсэн юм. Ингэхдээ Ц.Оюунбаатар нь Шадар сайдын алба хашиж байхдаа 150 гаруй сая төгрөг шамшигдуулж, улсад их хэмжээний хохирол учруулсан гэж үзжээ.

Тэрээр “Тэмээн поло 2016” тэмцээнийг зохион байгуулах зардалд 27 сая төгрөг зарцуулснаас гадна нэмж 150 сая төгрөг олгох шийдвэр гарган, өөрөө ерөнхийлөгчөөр нь ажилладаг “Монголын тэмээн поло, спорт уралдаан аяллын холбоо” төрийн бус байгууллагынхантай үгсэж, дансанд дээрх мөнгийг шилжүүлж авсан хэрэгт буруутгагдаж байгаа юм.