Лондонгийн их сургуулийн коллежийн (UCL) судлаачдын баг Английн дундад зууны эхэн үед гэмт хэрэгтнүүдэд оноож байсан харгис шийтгэлийн золиос болсон хүний араг ясыг олжээ.

Гавлын ясанд шинжилгээ хийхэд 15-18 насны охин байсан бөгөөд түүний  хамар, уруулыг нь тайрч, духыг нь зүсэн, үсийг нь хуссан байсныг тогтоожээ. Судлаачид энэхүү шийтгэлийг МЭ 776-899 оны хооронд үйлдэгдсэн болохыг тооцоолсон байна. Хэрцгий харгислалаар нас барсан охины гавлын яс нь 1960-аад онд Английн өмнөд хэсэгт орших Басингсток хотоос олджээ.

UCL-ийн баг Антика сэтгүүлд судалгаагаа хэвлүүлэхдээ "Энэ тохиолдол нь Англид үйлдэгдэж байсан харгис шийтгэлийг харуулсан анхны археологийн олдвор боллоо” хэмээн онцолсон байна. МЭ 410 онд Ромчууд Их Британиас гарсны дараа 1066 оны Норманы байлдан дагуулал хүртэл үргэлжилсэн Англо-Саксоны үеийн хууль тогтоомжоор хулгай хийж, баригдсан боолуудад энэ төрлийн шийтгэл оногдуулдаг байжээ.

Эх сурвалж: CNN